كل سنة والجميع بخير يبدا عيد الاضحى عندنا بالذهاب اولا للصلاة فى المسجد وبعد الصلاة تتم المعايدة على الجيران وكل واحد يطلب العفو من التانى طلبا للسماح اذا كان فى خصومة وبدا صفحة جديدة (دى عادة عند اغلب اهلنا فى السودان). وبعد رجوع الرجال للبيت يقوم واحد منهم بذبح الخروف ويذبح فى الشارع قدام البيت اذا كان مافى مجال داخل الحوش (الفناء) وبعدين يعلق على باب البيت ويسلخ ويقطع ويوزع جذء منه على الما ذابحين.ثم تقوم النساء بالطبخ اهم طبق هو الشية (شواء اللحم فى الشواية على الجمر) ومن الاطباق ايضا اللحمة المحمرة مقطعة قطع صغيرة.وبرضو الدمعة(مكونة من البصل واللحم والصلصة والزيت).واالمرارة(اجذاء من احشاء الخروف بعد غسلها بالماء الحارمكونة من الرئة والكبد والكرشة والبصل ) دى وجبة الفطور.والغداء لحمة محمرة او ضلع(قطع كبيرة من اللحم تسلق بالبهارات تم تتبل بالخلطة وتحمر فى الزيت).وكمونية (اجذاء من احشاء الخروف تطبخ مع البصل والزيت والصلصة ).اما راس الخروف وارجله(كوارع) الزمن لطبخها اختيارى ممكن تانى يوم للعيد او اى يوم من ايام العيد.وبعد الاكل يشرب الغالبية شراب الشربوت(مصنوع من البلح وبعض من البهارات المنوعة والماء) لانه يهضم الاكل بسرعة والبعض لايشربه.وكل سنة تامين ولامين.